റെയില്‍വേയില്‍ വിവിധ ക്ലര്‍ക്ക് തസ്തികകളില്‍ 1688 ഒഴിവുകള്‍; എസ്എസ്എല്‍സി, പ്ലസ്ടുക്കാര്‍ക്ക് അവസരം
റെയില്‍വേയില്‍ വിവിധ ക്ലര്‍ക്ക് തസ്തികകളില്‍ 1688 ഒഴിവുകള്‍; എസ്എസ്എല്‍സി, പ്ലസ്ടുക്കാര്‍ക്ക് അവസരം
റെയില്‍വേ റിക്രൂട്ട്മെന്റ് ബോര്‍ഡ് എന്‍ടിപിസി അണ്ടര്‍ ഗ്രാജ്വേറ്റ് ഒഴിവുകള്‍ നികത്തുന്നതിനുള്ള നിയമന വിജ്ഞാപനം പുറത്തിറക്കി. നോണ്‍-ടെക്‌നിക്കല്‍ പോപ്പുലര്‍ കാറ്റഗറീസിന് (അണ്ടര്‍ ഗ്രാജ്വേറ്റ്) കീഴിലുള്ള വിവിധ തസ്തികകളിലേക്കുള്ള നിയമന വിജ്ഞാപനമാണ് പുറത്തിറക്കിയിരിക്കുന്നത്. ട്രെയിന്‍സ് ക്ലര്‍ക്ക്, കൊമേഴ്സ്യല്‍ കം ടിക്കറ്റ് ക്ലര്‍ക്ക്, അക്കൗണ്ട്‌സ് ക്ലര്‍ക്ക് കം ടൈപ്പിസ്റ്റ്, ജൂനിയര്‍ ക്ലര്‍ക്ക് കം ടൈപ്പിസ്റ്റ് എന്നീ ഒഴിവുകളിലേക്കാണ് നിയമനം നടക്കുന്നത്.
എല്ലാ തസ്തികകളിലുമായി 1688 ഒഴിവുകള്‍ഴ ആണ് റിപ്പോര്‍ട്ട് ചെയ്തിരിക്കുന്നത്. പത്താം ക്ലാസും പന്ത്രണ്ടാം ക്ലാസും വിജയിച്ച ഉദ്യോഗാര്‍ത്ഥികള്‍ക്ക് ഈ തസ്തികകളിലേക്ക് അപേക്ഷിക്കാം. അപേക്ഷാ നടപടികള്‍ ഒക്ടോബര്‍ 15-ന് ആരംഭിക്കും. അപേക്ഷിക്കാനുള്ള അവസാന തീയതി നവംബര്‍ 13 ആണ്. രജിസ്‌ട്രേഷന്‍ ആരംഭിച്ചാലുടന്‍ യോഗ്യരായ ഉദ്യോഗാര്‍ത്ഥികള്‍ക്ക് അപേക്ഷ സമര്‍പ്പിക്കാം.
ഔദ്യോഗിക വെബ്സൈറ്റ് വഴി ഓണ്‍ലൈനായി മാത്രമാണ് അപേക്ഷകള്‍ സ്വീകരിക്കുന്നത്. തിരഞ്ഞെടുക്കപ്പെടുന്ന ഉദ്യോഗാര്‍ത്ഥികള്‍ക്ക് ഏഴാം കേന്ദ്ര ശമ്പള കമ്മീഷന്‍ പ്രകാരം പേ ലെവല്‍ 2-ല്‍ 19,900 രൂപയും പേ ലെവല്‍ 3-ല്‍ 21,700 രൂപയും പ്രതിമാസ ശമ്പളമായി ലഭിക്കും. ഈ റിക്രൂട്ട്മെന്റ് നടപടിയിലൂടെ നിയമിക്കപ്പെടുന്നവരെ രാജ്യത്ത് എവിടെയും നിയമിക്കാവുന്നതാണ്.
2027 ജനുവരി 1-ന് 18-നും 30-നും ഇടയില്‍ പ്രായമുള്ള ഉദ്യോഗാര്‍ത്ഥികള്‍ക്ക് അപേക്ഷിക്കാം. ജനറല്‍ വിഭാഗത്തിലുള്ള ഉദ്യോഗാര്‍ത്ഥികള്‍ക്ക് അപേക്ഷാ ഫീസ് 500 രൂപയാണ്. സംവരണ വിഭാഗത്തില്‍പ്പെട്ട ഉദ്യോഗാര്‍ത്ഥികള്‍ക്ക് ഫീസ് 250 രൂപയായിരിക്കും. ഒന്നാം ഘട്ട കമ്പ്യൂട്ടര്‍ അധിഷ്ഠിത പരീക്ഷ, രണ്ടാം ഘട്ട കമ്പ്യൂട്ടര്‍ അധിഷ്ഠിത പരീക്ഷ, രേഖകളുടെ പരിശോധന എന്നിവ ഉള്‍പ്പെടുന്നതാണ് തിരഞ്ഞെടുപ്പ് പ്രക്രിയ.
ആധാര്‍ വഴി പരിശോധിക്കാത്ത അപേക്ഷകള്‍ റിക്രൂട്ട്മെന്റ് പ്രക്രിയയുടെ ഓരോ ഘട്ടത്തിലും വിശദമായ പരിശോധനയ്ക്ക് വിധേയമാക്കേണ്ടി വരികയും, അതുമൂലം ബുദ്ധിമുട്ടുകളും കാലതാമസവും ഉണ്ടാവുകയും ചെയ്‌തേക്കാം. ഇത് ഒഴിവാക്കാന്‍, ഓണ്‍ലൈന്‍ അപേക്ഷാ ഫോം പൂരിപ്പിക്കുമ്പോള്‍ ആധാര്‍ ഉപയോഗിച്ച് പ്രാഥമിക വിവരങ്ങള്‍ പരിശോധിക്കണമെന്ന് ഔദ്യോഗിക വിജ്ഞാപനത്തില്‍ വ്യക്തമാക്കിയിട്ടുണ്ട്.
വിജയകരമായ ആധാര്‍ പരിശോധനയ്ക്കായി, ആധാറിലെ പേരും ജനന തീയതിയും പത്താം ക്ലാസ് പാസ് സര്‍ട്ടിഫിക്കറ്റിലെ പേരുമായും ജനന തീയതിയുമായും പൊരുത്തപ്പെടേണ്ടതുണ്ട്. അതുപോലെ, ഓണ്‍ലൈന്‍ അപേക്ഷാ ഫോം പൂരിപ്പിക്കുന്നതിന് മുമ്പ്, ഏറ്റവും പുതിയ ഫോട്ടോയും ബയോമെട്രിക് വിവരങ്ങളും (വിരലടയാളം, ഐറിസ് എന്നിവയുള്‍പ്പെടെ) ആധാറില്‍ അപ്ഡേറ്റ് ചെയ്തിട്ടുണ്ടെന്ന് ഉദ്യോഗാര്‍ത്ഥികള്‍ ഉറപ്പാക്കണം.
നിയമനവുമായി ബന്ധപ്പെട്ട എല്ലാ നിബന്ധനകളും വ്യവസ്ഥകളും യോഗ്യതാ മാനദണ്ഡങ്ങളും നടപടിക്രമങ്ങളും മറ്റ് ആവശ്യകതകളും വിശദമായ വിജ്ഞാപനത്തിന് അനുസൃതമായിരിക്കും. എല്ലാ ആര്‍ആര്‍ബികളുടെയും പൊതു വെബ്സൈറ്റായ rrb.indianrailways.gov.in-ല്‍ മാത്രമായിരിക്കും ഈ വിശദമായ വിജ്ഞാപനം പ്രസിദ്ധീകരിക്കുക. ഈ പൊതു വെബ്സൈറ്റ് വഴി ഉദ്യോഗാര്‍ത്ഥികള്‍ക്ക് ഓരോ ആര്‍ആര്‍ബിയുടെയും വെബ്പേജുകള്‍ സന്ദര്‍ശിക്കാവുന്നതാണ്.
 |
-----------------------------------------------------------------------------------------------------------------------------